خاينة.. خاينة.. خاينة..

موضوع: خاينة.. خاينة.. خاينة.. 2008-06-30, 10:23 pm

خاينة.. خاينة.. خاينة..

ماتتخضوش ده مش فيلم عربي.. دي الكلمة اللي
كنت باقولها ساعة لما خدعتني حبيبيتي.. أول واحدة حبيتها في حياتي.. حسيت
ساعتها إن الدنيا ضلمت.. مش شايف حاجة قدامي.. حاسس إن الزمن خلاص وقف..
أيوه وقف عند اللحظة اللي باعتني فيها.. خاينة.. خاينة.. خاينة.. لا
مؤاخذة.. أصلي افتكرت اللحظة دي.. ياه... فات كتير قوي.. بس لسه فاكرها زي
ما تكون حصلت دلوقتي...

يومها أنا فاكره كويس.. كان يوم عيد
ميلادها.. كان بقالي كتيييييير ماشفتهاش... ماكنتش من هواة الاتصالات
والخروجات والفسح.. كان حبي مثالي حبتين.. المهم كان فيه حفلة منظماها
الجامعة وكانت هي هتحضرها.. يا سلام.. هي دي الفرصة المناسبة اللي ممكن
أشوفها فيها.. قعدت أحضر في الكلام اللي هاقوله ليها.. قعدت أدور ع
الهدية.. أجيب إيه يا ترى؟.. أقول إيه؟... أقول لها الكلمة اللي عمري ما
قلتها غير بعينيّ.. بلهفتي عليها.. بشوقي إليها.. أقول لها باحبك..
وحشتيني.. لأ.. كالعادة مش هاقدر.. أنا عارف كويس إنها هتحس بده من غير ما
أقوله.. خلاص.. هاقول لها: "كل سنة وإنت طيبة يا..." وهاكمل بعينيّ.. طبعا
حضراتكم هتقولوا إيه الواد الخنيق ده.. بس والله ساعتها ده اللي حصل..

المهم.. حضّرت الكلمتين، وجبت الهدية
التمام، ولبست اللي ع الحبل، ورحت الحفلة.. وفجأة ألاقي الهانم اللي
اديتها كل حبي داخلة ومعاها شلة كده كنت أول مرة أشوفها.. سلمت عليّ كأني
حد كده أول مرة تشوفه.. قعدت مع الشلة إياها وهات يا ضحك.. وبعدين.. أعمل
إيه؟ خدت حبايتين شجاعة، ورحت واقف قدامها زي الباشا، وقلت ليها: "ممكن أكلمك ثانية واحدة..".. الحقيقة طلعت ذوق قوي.. يدوبك بس بينت إنها مخنوقة مني.. بس في الآخر قامت.. اديت ليها الهدية.. بصيت في عينيها وقلت ليها: "كل سنة وإنت طيبة".. قالت لي: "وإنت بأي حق تديني هدية؟..".. ماعرفتش أقول إيه.. لاقيت نفسي باقول: "بحق الحب اللي بيني وبينك..".. قالت لي: "حب إيه يا ابني إنت.. أنا خلاص اتخطبت ولو خطيبي شافني معاك دلوقتي مش هيحصل كويس.."..

سحبت نفسي من الحفلة بالراحة جدا ومن غير ما
حد يحس.. طول السكة قعدت أقول: خاينة.. خاينة.. خاينة.. هي ما تستاهلنيش..
أيوه.. بس ازاي هاعيش من غيرها؟.. بس تخيلوا.. قدرت أعيش من غيرها، وعدت
الأيام، وسنة تجيب سنة، وأنا عايش وزي الفل.. حبيت واتحبيت.. اتجوزت
وخلفت، وتمام التمام.. دلوقتي لما بافتكر الموضوع ده باضحك قوي.. عارفين
ليه.. بيني وبينكم أصلها لا خاينة ولا يحزنون.. طيب خليكم مكانها.. واحد
عمره ما قال ليها كلمة باحبك، ولا حاول حتى إنه يحسسها بحبه، ولا بذل أي
مجهود عشان يوصل لحبه ده، يبقى عايز إيه؟.. عايزها هي تفتح الفنجان ولا
تقرا الكف عشان تعرف إنه بيحبها..

حاجات كتير بيتخيلها الإنسان وييحس إن اللي قدامه عايش معاه في الخيال ده.. لأ وييحاسبه على كده كمان.. والله فعلا حاجة غريبة..

المهم قولولي إنتم رأيكم إيه؟

إنتم معايا إني كنت
مزودها حبتين، وإنها مش خاينة ولا حاجة، ولا هي كانت لازم تحس بالحب ده من
غير حاجة وتصون العهد اللي أنا عشته في خيالي، وإنها تستحق الكلمة اللي
قلتها عليها ساعتها؟..
إنها خاينة.. خاينة.. خاينة..

_________________

موضوع: رد: خاينة.. خاينة.. خاينة.. 2008-06-30, 11:47 pm

موضوع: رد: خاينة.. خاينة.. خاينة.. 2008-07-01, 12:00 am

الموضوع جميل اوي

وبيقع فية شباب كتير
ودة لانهم مش بيبقوا ليهم تجارب في الحياة

بس انا من رايي
ان اي شاب يحب بنت
ويتاكد من مشاعرة اتجاهها
لازم بسرعة يروح ويكلمها
لان من شدة حبة ليها بيوصل لمرحلة انة بيتخيلها معاة في كل لحظة وهو بياكل وهو بيشرب وهو ماشي والخ الخ000000000000
لدرجة بتوصلة انة يحس انها خلاص بقت بتاعتة هو وبس
وهو حتي لسة مكلمهاش او حتي لمح ليها

ودة بيبقي وهم عايش فية نتيجة حبة الشديد ليها

فانا من راي ان اي شاب يعجب ببنت ويتاكد من مشاعرة اتجاها يكلمها فورا ويعرف مشاعرها اية

من الاخر يقطع عرق ويسيح دمة
علشان مايعشي في وهم ويبني احلامة علي اوهام
_________________
تقبلوا خالص تحياتي
وليد الصباحي

موضوع: رد: خاينة.. خاينة.. خاينة.. 2008-07-01, 12:03 am

ميرسى لردودكم يا جماااااااااااااعه

ارائكم جميله
_________________

موضوع: رد: خاينة.. خاينة.. خاينة.. 2008-07-01, 12:05 am

كلام جميل
وكلام معقول
ما أقدرش أقول
حاجة عنه

ولكن...
انت دلوقتي بتكلم ناس لسة في سن الدراسة
مش كلهم بيكونوا جاهزين لاتخاذ الخطوة دي يا وليد
انت عارف ظروف الشباب بقت عاملة ازاي اليومين دول

وطبعا مهما كانت الظروف
محدش بيقدر يستغنى عن الحب
ويمكن دا اللي بيخلي الشاب يعمل كدة
يعيش في الوهم
ولا قادر يتكلم ولا في ايده حاجة يعملها
وفي نفس الوقت نفسه يحب ويتحب

بس أنا مختلف معاك في حكاية يقطع عرق ويسيح دم دي
إلا إذا كانت بطريقة رسمية يا وليد

لأن من وجهة نظري إن الكلام في الحاجات دي
من حق أهل البنت
ولو حصل وكلمت البنت قبل أهلها
يبقى انت كدة بتسلب حقهم في إنهم يوافقوا أو يرفضوا عريس بنتهم
ودا طبعا حق كبير أوي وليه معاني كبيرة جدا
_________________
الرمز لا يموت.. فإن عشت فعش حراً أو مت كالأشجار.. وقوفاً

موضوع: رد: خاينة.. خاينة.. خاينة.. 2008-07-01, 12:10 am

بس لازم يقولها من حقها تعرف

وتفكر وتقرر هتستناه ولا لا

ماينفعش يفضل عايش الوهم بينه وبين نفسه

افرض هى مرتبطه مثلا

يبقى بيعلق نفسه بحبال دايبه
_________________

موضوع: رد: خاينة.. خاينة.. خاينة.. 2008-07-01, 12:13 am

انا لما اتكلمت علي مجمل الموضوع
ياحمد
_________________
تقبلوا خالص تحياتي
وليد الصباحي

موضوع: رد: خاينة.. خاينة.. خاينة.. 2008-07-01, 12:15 am

بص علشان افهمك الموضوع دة

كمان
هحكيلك حكاية حصلت ليا بس خليها بيني وبينك مش علي المنتدي
_________________
تقبلوا خالص تحياتي
وليد الصباحي

موضوع: رد: خاينة.. خاينة.. خاينة.. 2008-07-01, 12:16 am

طب وانا عاوزه اعرف انا كمان انتوا فى موضوعى ماليش دعوه
_________________

موضوع: رد: خاينة.. خاينة.. خاينة.. 2008-07-01, 12:21 am

لا لا لا لا لا لااا

يبقي انا كدا هفضح نفسي

خليها بيني وبينة احسن
_________________
تقبلوا خالص تحياتي
وليد الصباحي

موضوع: رد: خاينة.. خاينة.. خاينة.. 2008-07-01, 12:22 am

وانا مااااااااااااااااااااااااالى فيها لاخفيها

هههههههههههههههه
_________________

موضوع: رد: خاينة.. خاينة.. خاينة.. 2008-07-01, 12:27 am

طب الفلة في المنافلة

هتشبطي بقي زي
ولا بلاش احسن تكوني منهم
_________________
تقبلوا خالص تحياتي
وليد الصباحي

موضوع: رد: خاينة.. خاينة.. خاينة.. 2008-07-01, 12:29 am

دول احباب الله

خلاص مش عاوزه حاجه
_________________

موضوع: رد: خاينة.. خاينة.. خاينة.. 2008-07-01, 12:33 am

خلاص ماشي

بس هوة الموضوع كويس

لانة انتشر كتير
وخصوصا في الاونة الحالية

وشوفتها عملي قدامي
_________________
تقبلوا خالص تحياتي
وليد الصباحي

موضوع: رد: خاينة.. خاينة.. خاينة.. 2008-07-01, 12:42 am

ميرسى لمرورك
_________________

موضوع: رد: خاينة.. خاينة.. خاينة.. 2008-07-25, 1:23 pm

و الله الموضوع ده حلو قوي
بس هو عامل زي اللي بيسلم علي الهوا و مستني ان الهوا ياخده بالحضن و يعزمه عنده علي الغدا
و الموضوع ده بيتكرر كتير قوي في الحياة و تلاقي الشاب اللي بيحب علي نفسه ده لما البنت اللي هو بيحبها و هي مش عارفه تتخطب او تحب واحد تاني بدا يكرهها و يبص ليها بصات معناها انها خانت العهد اللي بينهم و ممكن يروح يقولها
انا حرمت نفسي من العشا عشان تستعشي و من الغطا عشان تستغطي
انتي اللي زيك مش لازم يعيش ليوم التلات و لا الاربع
يعني بدل ما يتنيل علي عينه و يتهد لا بيزعل و يعمل قال ايه ضربه من ضهره
ربنا يتولانا برحمته

_________________
Just Be Yourself Only